Kristján Óli Sigurðsson, sérfræðingur í hlaðvarpsþættinum Dr. Football, var harðorður í garð ríkisstjórnar Íslands, borgarstjórnar Reykjavíkur og Knattspyrnusambands Íslands vegna þess þjóðarleikvangsins sem Ísland hefur upp á að bjóða til knattspyrnuiðkunar.

Lengi hefur verið vakin athygli á því að nýjan þjóðarleikvang vanti á Íslandi. Laugardalsvöllur er kominn til ára sinna og þörf er á endurbótum.

Íslenska karlalandsliðið lék vináttulandsleik á nýjum og endurbættum þjóðarleikvangi Færeyja á dögunum. Það vakti upp reiði hjá Kristjáni og fékk hann til þess að minnast á þörfina á nýjum velli á Íslandi.

,,Eftir að við vorum að spila landsleik við Færeyinga, í Færeyjum á glænýjum velli. Þá fá ríkistjórn Íslands, borgarstjórn Reykjavíkur og KSÍ öll red card frá mér,“ sagði Kristján í þætti Dr. Football í gær.

Hann sagði einnig að framkvæmdir þyrftu að hefjast sem fyrst ef ekki eigi að fara svo að íslenskt landslið neyðist til þess að flytja heimaleiki yfir til nágrannaþjóða.

,,Drullist þið til að byggja nýjan völl og það strax áður en við þurfum að fara að spila heimaleiki í einhverri undankeppni HM eða EM í Danmörku eða Svíþjóð eða hvað sem er. Þetta þarf bara að gerast núna! Ekki búa til nefnd númer 3200. Bara byggja helvítis völlinn, takk!“

Smelltu hér til að hlusta á þátt Dr. Football frá því í gær.