Ashley Young bakvörður Inter Milan skoðar nú framtíð sína en hann er sagður mjög eftirsóttur þrátt fyrir að fagna 36 ára afmæli sínu í sumar.

Young hefur verið í herbúðum Inter í rúmt ár en samningur hans er á enda í sumar, liðið er að vinna Seriu A í fyrsta sinn í ellefu ár.

Ensk blöð segja að Young sé með fullt af tilboðum á Englandi og erlendis, Inter vill halda honum en hugur Young leitar heim.

Þannig segja ensk blöð að Young hafi áhuga á að fara aftur til Watford þar sem hann hóf feril sinn, félagið er á leið aftur upp í ensku úrvalsdeildina.

Young var lengi vel í herbúðum Manchester United og var fyrirliði félagsins þegar hann fór til Inter í janúar á síðasta ári. Young er að skrifa sig í sögubækurnar á Ítalíu en hann verður fyrsti enski leikmaðurinn til að vinna úrvalsdieldina þar í landi frá árinu 1963 en þá varð Gerry Hitchens meistari með Inter.