Jurgen Klopp, knattspyrnustjóri Liverpool, segir að sitt lið verði að spila fullkominn leik á morgun gegn Real Madrid til þess að tryggja sér sæti í undanúrslitum Meistaradeildar Evrópu.

Liverpool tekur á móti Real Madrid á Anfield á morgun en fyrri leik liðanna lauk með 3-1 sigri Real Madrid.

Liverpool hefur í þónokkur skipti í knattspyrnusögunni náð hinum ótrúlegustu endurkomum en Klopp segir að það muni skipta litlu máli á morgun.

„Þú nærð ekki endurkomu vegna þess að þú hefur náð endurkomu áður. Þú átt aðeins möguleika ef þú spilar góðan fótbolta í nútíðinni. Auðvitað væri lang best að koma sér ekki í þá stöðu að þurfa á endurkomu að halda en það þýðir ekkert fyrir okkur að tala um það núna,“ sagði Klopp á fréttamannafundi fyrir leik.

Það er skýrt í huga Klopps, hvað Liverpool þarf að gera annað kvöld.

„Við megum ekki fá á okkur mark og ef við sköpum fleiri færi en við gerðum í síðasta leik, þá getum við komið okkur í góða stöðu,“ sagði Jurgen Klopp, knattspyrnustjóri Liverpool.

Leikur Liverpool og Real Madrid á Anfield annað kvöld hefst klukkan 19:00.