Rúnar Kristinsson, þjálfari karlaliðs KR í knattspyrnu, var gestur í þættinum 433.is sem var sýndur á Hringbraut í gærkvöldi. Í þættinum fór Rúnar yfir ýmis mál tengd KR, meðal annars brottför leikjahæsta leikmanns félagsins, síðasta tímabil og framtíðaráform hjá KR og efstu deildar.

Margir KR-ingar gráta brotthvarfið á einum af sínum dáðustu sonum en Óskar Örn Hauksson hafnaði nýjum samningi frá KR.

KR bauð Óskari eins árs samning en Stjarnan bauð þessum 37 ára knattspyrnukappa tveggja ára samning og betri laun.

„Við vorum tilbúnir til þess að halda Óskari á þeim launum sem hann er búinn að vera á án þess að fara einhvað nánar út í það. Hann tók sitt val og það var allt gert í sátt og samlyndi. Við þurfum að meta í hvað peningarnir okkar fara og hversu mikið hver og einn á að fá,“ sagði Rúnar í viðtalinu sem sjá má hér að neðan.

„Óskar er búinn að þjóna félaginu í ég veit ekki hvað mörg ár. Hann er búinn að vera einn besti leikmaður KR frá því að hann kom til félagsins og einn besti leikmaður efstu deildar. Hann er markahæsti leikmaðurinn í sögu KR og sá leikjahæsti en við getum ekki bara út frá því hækkað launinn hans upp í topp, það þarf að vera einhver skynsemi á bakvið það,“ sagði Rúnar í þættinum 433.is.

Hann segir Óskar hafa þjónað KR vel. ,,Hann hafði val um að vera hjá okkur eða fara einhvað annað og hann valdi að fara í Stjörnuna. Við virðum hans ákvörðun þó svo að allir KR-ingar hefðu viljað sjá hann enda ferilinn í KR.“