West Ham sigraði Chelsea í skemmtilegum leik í ensku úrvalsdeildinni í dag. David Moyes, þjálfari West Ham fannst spilamennskan ekkert sérstök í dag en þótti vera heppnisstimpill yfir sigurmarkinu.

„Mér fannst við ekki spila sérskalega vel í dag. En við náðum að skora mörkin sem skipta miklu máli. Áður höfum við spilað betur en ekki náð að skora. En í dag skoruðum við og það gegn liði sem fær fá mörk á sig. Það verður að hrósa strákunum fyrir það,“ sagði Moyes við BT Sport.

„Við vorum miklu betri í seinni hálfleik. Við vorum alltof passífir í fyrri hálfleiks. Það eru mikil gæði í Chelsea, enda eru þeir Evrópumeistarar. Þeir eru góðir í öllu.“

Masuaku skoraði sigurmarkið í leiknum en markið sjálft var ansi skrautlegt. Masuaku ætlað að senda boltann fyrir en fyrirgjöfin endaði sem skot og var Mendy of seinn að bregðast við í markinu og boltinn endaði í netinu.

„Ég sagði við hann að þetta hefði verið frábær fyrirgjöf. Þetta var mikil heppni, en í fótbolta þarftu stundum heppnina með þér. Við höfum ekki verið heppnir í síðustu leikjum en í dag var heppnin með okkur í liði.“