Það má búast við því að rekstur KSÍ gangi ekki eins vel og lagt var upp með í upphafi árs. Þannig var gert ráð fyrir því að KSÍ myndi hagnast um 182 milljónir á þessu ári.

Reksturinn hefur hins vegar verið þungur ef miðað er við fundargerð sambandsins sem birt var í dag. Þar var farið yfir stöðuna eftir níu mánuði á rekstrarárinu.

„Klara Bjartmarz framkvæmdastjóri kynnti níu mánaða uppgjör sambandsins. Tekjur ársins verða mun lægri en gert var ráð fyrir í áætlun, m.a. covid takmarkana sem vörðu lengur en áætlað var,“ segir í fundargerð KSÍ

Þá gekk illa að selja miða á A-landsleiki karla en mikill stormur hafði geysað í kringum liðið. „Vegna dræmrar miðasölu á landsleiki A landsliðs karla og lægri framlaga frá UEFA en gert var ráð fyrir (færast yfir á næsta ár). Rekstrargjöld eru í flestum tilfellum í samræmi við fjárhagsáætlun en þó fara einstaka liðir framyfir áætlun, sbr. til dæmis ársþing og aukinn ráðgjafarkostnaður.“

Þannig má ætla að ráðgjafarkostnaður tengist þeim erfiðu málum sem KSÍ hefur átt í erfiðleikum með að eiga við.

Kostnaður við landslið er þó minni en ráð var gert fyrir. „Landsliðskostnaður verður lægri en gert var ráð fyrir. Spá fyrir afkomu ársins hefur þó batnað frá 6 mánaða uppgjöri,“ segir í fundargerð KSÍ.