Aron Jóhannsson, sem á dögunum skrifaði undir þriggja ára samning við efstu deildar lið Vals í knattspyrnu, er gestur í þættinum 433.is sem verður sýndur á sjónvarpsstöðinni Hringbraut í kvöld.

Aron kemur heim eftir tæp ellefu ár í atvinnumennsku en ferill hans hefur verið hreint magnaður. Aron hóf atvinnumannaferil sinn í Danmörku, hann hélt síðan til Hollands, Þýskalands, Svíþjóðar og loks Pólland.

Aron var í rúmt ár í Svíþjóð þar sem hann upplifði mjög góða tíma. Eitt af því sem stendur þar upp úr er það að hafa æft með Zlatan Ibrahimovic.

Zlatan er einn af eigendum Hammarby en þegar COVID-19 veiran var að hrella flesta héldu Svíar sínu striki og æfðu. Zlatan fór því heim og fór að æfa með liðinu sem hann á.

„Það var furðulegt, maður hefur spilað með stórum karakterum bæði í landsliði og á ferlinum. Þetta var á næsta stigi, hann kemur þarna út af COVID og æfir með okkur í einhverja tvo mánuði. Helvítis gæinn tapaði ekki einu sinni á æfingu, þetta er vélmenni,“ segir Aron í þætti kvöldsins sem verður sýndur klukkan 20:00 á Hringbraut.

Zlatan er í dag fertugur og leikur með AC Milan í úrvalsdeildinni á Ítalíu. „Þú sérð hann þar, þú getur ímyndað þér hvernig hann var á æfingum hjá okkur í Svíþjóð.

Aron hélt svo áfram og sagði. „Eins og ég lýsti þessu fyrir vini mínum, þetta væri eins og ég færi að æfa með 4 flokki. Hann er nálægt tveimur metrum og er 90 kíló. Hann er miklu sterkari en allir og hefur miklu meiri kraft. Tæknin og hæfileikarnir, þetta er bara galið. Þetta gaf okkur auka kraft,“ sagði ron

„Við vorum alltaf í sitthvoru liðinu sem framherjar, ég vann því varla leik á æfingu í tvo mánuði. Við lögðum meira á okkur á hverri æfingu til að reyna að vinna hann en það gekk ekki vel.“