Leeds tók á móti Crystal Palace á Elland Road í ensku úrvalsdeildinni í kvöld.

Heimamenn voru betri aðilinn í leiknum en þrátt fyrir að vera með fleiri marktilraunir og meira með boltann þá átti liðið aðeins þrjár tilraunir á rammann.

Hvorugu liði tókst að koma boltanum í netið í fyrri hálfleik og staðan markalaus þegar liðin gengu til búningsklefa.

Allt stefndi í jafntefli þegar Leeds fékk dæmda vítaspyrnu í uppbótartíma eftir að boltinn fór í höndina á Marc Guehi. Kevin Friend, dómara leiksins, var sagt að fara og skoða atvikið í skjánum og niðurstaðan vítaspyrna.

Raphinha fór á vítapunktinn og hikaði örlítið í upphlaupinu áður en hann setti boltann í vinstra hornið framhjá Vicente Guaita, markverði Palace.

Leeds fer upp í 15. sæti með sigrinum í kvöld og er með 15 stig eftir 14 leiki, einu stigi á eftir Crystal Palace sem er í 12. sæti með 16 stig.

Leeds 1 – 0 Crystal Palace
1-0 Raphinha (’90+3, víti)