Giftur leikmaður í ensku úrvalsdeildinni hefur í fyrsta sinn viðurkennt að hafa átt í sambandi með Jaqueline Sousa, konu sem hefur frá því snemma á þessu ári sagt hann vera föður dóttur hennar.
The Sun hefur fjallað um málið reglulega frá því í vor. Af lagalegum ástæðum má ekki nefna leikmanninn í breskum miðlum. Það kemur þó fram að hann sé erlendur (ekki enskur) og að hann sé vel þekkt nafn.
Málið rataði fyrst í fréttamiðla í vor. Þar var fjallað um það að leikmaðurinn hafi meira að segja sett sig í samband við Sousa er hann var í brúðkaupsferð með eiginkonu sinni.
Dóttir Sousa sem á einnig að vera dóttir knattspyrnumannsins er orðin 18 mánaða gömul. Sousa segir manninn ekki hafa veitt þeim neina fjárhagslega aðstoð hingað til.
Leikmaðurinn hefur samþykkt að gangast undir faðernispróf. Nú eru aðilar hins vegar ekki sammála um hvar það eigi að fara fram.
Sousa vill að leikmaðurinn taki prófið erlendis, hún býr ekki á Englandi og segir að þau verði að taka prófið á sömu læknastofu.
,,Hann neitar ekki að við höfum átt í sambandi og að barn hafi fæðst eftir það. Hann er til í að taka faðernispróf,“ sagði Sousa við The Sun nýlega.
,,Hann vill hins vegar taka það á Englandi en lögfræðiteymið mitt samþykkir það ekki því barnið fæddist erlendis. Við verðum að taka prófið á sömu læknastofu. Ég er nokkuð viss um að þetta er vegna þess að konan hans vill ekki hitta mig.“
,,Fyrst vildi hann ekki einu sinni taka faðernispróf og hundsaði bréf frá mér. Nú hefur hann samþykkt að taka próf en vill gera það á sínum forsendum. Hann segist ekki geta ferðast vegna Covid þar sem það hafi áhrif á æfingarnar hans. Svo sagði hann meira að segja að konan hans væri ólétt og að hann gæti ekki tekið prófið núna vegna þess. Það er algjört kjaftæði að hann geti leikið knattspyrnu úti um allan heim en geti ekki ferðast til að taka eitt próf.“
