Davíð Örn Atlason er á ný orðinn leikmaður Víkings Reykjavíkur eftir erfiða tíma hjá Breiðablik undanfarið ár. Tími hans hjá blikum litaðist af meiðslum og hann náði sér aldrei á flug. Hjá Víkingum gefs honum tækifæri á að komast aftur á flug sem leikmaður.
,,Það er óhætt að segja það ég sóttist svolítið eftir þessu sjálfur eftir að hafa verið með heimþrá í sumar og það er bara gott að þetta sé orðið klárt. þetta tók tíma en er loksins orðið klárt,“ sagði Davíð Örn við 433.is í dag eftir að tilkynnt hafði verið um félagsskipti hans til Víkings Reykjavíkur.
Hann segist lítið geta kvartað yfir spilatíma sínum hjá Breiðablik á síðasta tímabili sem var litað af meiðslum.
,,Ég var náttúrlega meiddur fyrsta hálfa árið og sumarið var svolítið litað af því. Liðið fór á skrið í sumar og ég gat ekkert kvartað yfir spilatíma mínum þar. Gæjinn sem var að spila í bakverðinum var að spila eins og kóngur. Liðið vann flesta leiki en þetta var samt alveg líka skemmtilegt sumar, sérstakega þetta evrópuævintýri. það var gaman að taka þátt í því.“
Breiðablik átti í harðri baráttu við Víking Reykjavík um Íslandsmeistaratitilinn á síðasta tímabili, titillinn endaði í Fossvoginum og Davíð segist hafa upplifað sérstakar tilfinningar á þessum tíma.
,,Þetta var sérstakt. Ég spilaði lítið af mínútum í Smáranum þannig að þetta var skrítið. Það var ömurlegt þegar að ég var í Kaplakrika og horfði á KR klúðra vítinu gegn Víkingum en samt af því að maður spilaði ekki allar mínútur með Breiðabliki þá leyfði maður sér að samgleðjast með Víkingi líka. Maður upplifði sérstakar tilfinningar á þessum tíma,“ sem segist vera ánægður með metnaðinn hjá Víkingum en liðið hefur verið duglegt á leikmannamarkaðnum til þessa.
,,Það hefur aldrei vantað upp á metnaðinn hérna í Víkinni, hér er verið að blása í herlúðra en við verðum að átta okkur á því að við erum að missa tvo risa leikmenn í Kára og Sölva.“
En hvernig er standið á Davíð á þessum tímapunkti?
,,Ég er í þvílíkt góðu standi núna. Ég fór í kviðslitsaðgerð í mars og mér gekk erfiðlega að komast á stað eftir það en ég er búinn að vera heill heilsu síðan í júlí . Ég er í toppstandi,“ segir Davíð Örn Atlason, nýr leikmaður Íslands- og bikarmeistara Víkings Reykjavíkur.