FCK Kaupmannahöfn er komið áfram í 16-liða úrslit Sambandsdeildarinnar eftir sannfærandi 4-0 sigur á Lincoln Red Imps í kvöld.

Ísak Bergmann Jóhannesson og Hákon Haraldssson voru báðir í byrjunarliði FCK og það var Ísak sem skoraði fyrsta markið eftir fimm mínútna leik. Lukas Lerager bætti við öðru marki tveimur mínútum síðar og staðan 2-0 þegar flautað var til loka fyrri hálfleiks.

Ísak Bergmann lagði upp þriðja og fjórða mark FCK en þau skoruðu William Wick og Rasmus Hojlund. FCK sigrar F-riðil og fer því beint áfram í 16 liða úrslitin. Lincoln Red Imps er úr leik.

Tottenham þurfti að sætta sig við 2-1 tap gegn slóvenska liðinu NS Mura. Tomi Hovart kom Mura yfir með glæsilegu marki á 11. mínútu. Ryan Sessegnon fékk að líta sitt annað gula spjald og þar með rautt eftir rúmlega hálftíma leik og Tottenham orðið manni færri.

Harry Kane tókst að jafna metin í seinni hálfleik en Mura vann leikinn með marki í uppbótartíma, lokatölur 2-1 fyrir slóvenska liðið. Tottenham er í öðru sæti riðilsins þegar ein umferð er eftir og mætir Rennes á heimavelli í lokaumferðinni.

Rennes, Feyenoord, Basel og FC Qarabag eru öll komin áfram.