Rætt var um starfslok Eiðs Smára Guðjohnsens og umræddan gleðskap landsliðsins í hlaðvarpsþættinum Þungavigtin í dag. Ríkharð Óskar Guðnason, þáttastjórnandi Þungavigtarinnar, segist hafa verið í sambandi við aðila sem var í umræddum gleðskap fyrr í nóvember mánuði og hann spyr einfaldlega hver glæpurinn sé af hálfu Eiðs Smára Guðjohnsen
,,Þrátt fyrir ítrekaðar tilraunir hef ég ekki náð á Eið Smára, hann hefur ekki svarað, ekkert frekar en KSÍ. En í dag heyrði ég í aðila sem var þarna á staðnum og svona blasir þetta við,“ segir Ríkharð í þættinum Þungavigtin og rekur atbuðrðarrásina:
,,KSÍ býður upp á drykki eftir leikinn á móti Norður Makedóníu. Það liggur auðvitað ljóst fyrir að mótið er á þessum tímapunkti búið, verkefninu er lokið og skiptingin er þannig að leikmenn eru á einni hæð og starfsliðið á annarri hæð. Það er byrjað að sumbla frekar seint, leiknum lýkur seint og landsliðið átti að ferðast snemma morguninn eftir. Allir í starfsliðinu fá sér rauðvín þetta kvöld, það er gripið í spil,verið að fara yfir eitt og annað og í raun og veru lítið sofið. Starfsliðið þarf að vakna klukkan fimm að morgni til og fara í morgunmat og það er ljóst að þegar að þú ert búinn að sofa lítið og fá þér aðeins í glas þá er auðvitað misjafnt ástand á mönnum.“
,,Landsliðsþjálfarinn fer upp á herbergi klukkan eitthvað og Eiður Smári situr eftir, spjallar við son sinn og annan landsliðsmann áður en að farið er upp á herbergi. Eiður fer upp örlítið seinna, fór aldrei út af hótelinu eða neitt slíkt, það var ekkert vesen. Síðan var mætt í morgunmatinn, illa sofinn og þannig vindur þetta einhvernveginn upp á sig.“
Ríkharð Óskar spyr á þessum tímapunkti í þættinum hver glæpurinn sé og heldur áfram með mál sitt. ,,KSÍ var búið að leggja blessun sína yfir að menn myndu fá sér í glas. Menn áttu bara síðan að mæta í morgunmat sem Eiður gerði að mér skilst. Það var talað um að einhver hefði mætt seint í rútuna, það var hvorki Eiður né þessi leikmaður sem á að hafa farið yfir strikið í drykkju, Jón Dagur Þorsteinsson sem gerðu það. Birkir Már Sævarsson mætti of seint í rútuna og það tengist þessu ekki neitt.“
Hver er glæpurinn? spyr Ríkharð Óskar síðan aftur eftir að hafa rekið atburðarrásina eins og hún blasir við honum eftir að hafa rætt við einstakling sem var með landsliðinu umrætt kvöld. ,,Það er enginn glæpur,“ svaraði Mikael Nikulásson, sérfræðingur Þungavigtarinnar.
Seint í gærkvöldi birtist yfirlýsing á vefsíðu KSÍ þar sem að greint var frá því að sambandið hafi nýtt sér uppsagnarákvæði í samningi Eiðs. Í samtali við 433.is í dag segir Ómar Smárason, deildarstjóri samskiptasviðs sambandsins, að ákvörðunin sé tekin með persónuleg málefni Eiðs Smára í huga.
Þrátt fyrir ítrekaðar tilraunir hefur 433.is ekki náð á Vöndu Sigurgeirsdóttur, formann KSÍ né Arnar Þór Viðarsson, landsliðsþjálfara íslenska karlalandsliðsins, til þess að fá nánari útskýringar á starfslokum Eiðs Smára.
Vigtin fór í saumana á brottrekstri Eiðs Smára.
Vanda barðist með kjafti og klóm gegn stjórninni og reyndi allt til að halda honum í starfi.
Heimildarmaður sem var á staðnum umrætt kvöld segir þetta storm í vatnsglasi. Mikill hiti á mönnum í dag.
Drop hér https://t.co/Tbq8Ma8PaP pic.twitter.com/6BsmEr39GO— Rikki G (@RikkiGje) November 24, 2021