Það er eflaust erfitt að finna jafn ólíkar týpur og Birkir Bjarnason og Mario Balotelli. Þeir spila í dag saman hjá Adana Demirspor í Tyrklandi.
Balotelli er einn frægasti ólátabelgur fótboltans, hann hefur oftar en flestir komið sér í klandur utan vallar. Birkir er á meðan einn prúðasti knattspyrnumaður allra tíma.
Birkir er rólegur maður sem lætur verkin tala innan vallar, það hefur orðið til þess að hann hefur átt farsælan feril með félagsliðum og landsliði.
„Ég held að það sé enginn líkur Mario Balotelli í íslenska landsliðinu,“ sagði Birkir Bjarnason á fréttamannafundi í dag.
„Það er gaman að spila með honum, hann er skemmtileg týpa. Þetta er líka skemmtileg spurning,“ sagði Birkir brosandi.
Birkir segir að það sé gaman að vera í kringum Balotelli. „Hann er frábær týpa og persónuleiki. Það er gaman að vera í þessu með honum.“