Á morgun kemur í ljós hvaða liðum Ísland mun mæta í lokakeppni Evrópumóts kvenna í knattspyrnu á næsta ári. Þá verður dregið í riðla mótsins. Leikið verður á Englandi.
Alls munu sextán þjóðir taka þátt í lokakeppninni. Þetta er fjórða Evrópumótið í röð sem Ísland kemst á.
Drátturinn fer fram kl 16 á morgun að íslenskum tíma.
Hér fyrir neðan má sjá styrkleikaflokkanna fyrir dráttinn. Eitt lið verður dregið úr hverjum styrkleikaflokki í fjóra fjögurra liða riðla. Ísland er í fjórða og neðsta styrkleikaflokki og getur því aðeins mætt liðum úr fyrsta, öðrum og þriðja styrkleikaflokki.
Þess má geta að ljóst er að gestgjafar Englands, sem eru í efsta styrkleikaflokki, munu leika í A-riðli.
Styrkleikaflokkur 1: England, Holland, Þýskaland, Frakkland
Styrkleikaflokkur 2: Svíþjóð, Spánn, Noregur, Ítalía
Styrkleikaflokkur 3: Danmörk, Belgía, Sviss, Austurríki
Styrkleikaflokkur 4: Ísland, Rússland, Finnland, Norður-Írland
