Ísland mætir Kýpur á morgun í þriðja leik sínum í undankeppni HM 2023. Leikurinn fer fram á Laugardalsvelli og hefst hann kl. 18:45.

Ísland vann Tékkland 4-0 á föstudag á meðan Kýpur tapaði á sama tíma 0-8 gegn Hollandi. Kýpur er án stiga á botni riðilsins en Ísland er í þriðja sæti með 3 stig, en geta farið yfir Tékkland með sigri.

„Það eru allir leikmenn liðsins heilir og til í slaginn annað kvöld. Við munum gera nokkrar breytingar á byrjunarliðinu frá síðasta leik. Það er jákvætt að það sé komin mikil samkeppni um sæti í byrjunarliðinu og ég fagna því að þurfa að svara fyrir liðsval mitt fyrir leiki,“ sagði Þorsteinn Hreiðar Halldórsson, þjálfari íslenska kvennalandsliðsins á fréttamannafundi í dag.

„Ég finn fyrir því að sigurinn gegn Tékklandi í síðustu umferð gaf leikmönnum liðsins mikið sjálfstraust og ég hef ekki áhyggjur af spennufalli eða værukærð hjá liðinu í leiknum gegn Kýpur. Þrátt fyrir að kýpverska liðið hafi fengið skelli í fyrstu leikjum undankeppninnar þá er þetta duglegt lið sem erfitt er að brjóta á bak aftur,“ segir Þorsteinn enn fremur.

Kýpur hefur fengið á sig 20 mörk í þremur leikjum og aðeins skorað eitt mark, búast má við stórsigri Íslands.

„Við verðum að sýna andstæðingum okkar virðingu og fara af fullum krafti inn í verkefnið. Við viljum halda áfram að þróa leik lðisins í þá átt að þora að halda boltanum, sækja í ákveðin svæði og spila boltanum á milli línanna.“