Peter Schmeichel telur að Antonio Conte sé ekki rétti maðurinn fyrir Manchester United til að taka við af Ole Gunnar Solskjaer.

Fjölmiðlar á Bretlandi telja að Solskjaer sé ekki lengur öruggur sem stjóri Manchester United eftir slæmt gengi í ensku deildinni á tímabilinu. Manchester United tekur á móti Liverpool um helgina og vilja margir meina að það sé nokkurs konar úrslitaleikur fyrir Solskjaer.

„Það er alveg hægt að segja að Conte sé frábær en hann stoppar ekki við nema í 1-2 ár,“ sagði Schmeichel við The Times.

„Við erum ekki þannig félag. Við höfum reynt það og það virkar ekki. Louis van Gaal vann ekki Ensku úrvalsdeildina og Mourinho gerði það ekki heldur. Conte mun heldur ekki vinna hana.“

Schmeichel finnst gagnrýnin á Solskjaer furðuleg og hélt áfram:

„Vilja stuðningsmenn United í alvörunni annan Van Gaal eða Mourinho? Hvað vilja þeir?“

„Við höfum reynt að taka inn stjóra með stór nöfn en þeir sinna unglingaliðunum og þróun leikmanna ekki jafn vel og Ole gerir.“