Þorsteinn Halldórsson, landsliðsþjálfari íslenska kvennalandsliðsins, segist auðvitað hafa áhyggjur þegar að leikmenn landsliðsins spila ekki fyrir félagslið sín. Þetta kom fram í máli hans á blaðamannafundi í dag er hann var spurður út í stöðu Karolínu Leu Vilhjálmsdóttur hjá Þýskalandsmeisturum Bayern Munchen.

Karolina Lea var ekki í leikmannahópi Bayern í síðasta leik liðsins gegn Eintracht Frankfurt og þá hefur hún lítið spilað fyrir liðið að undanförnu. ,,Auðvitað vill maður að allir leikmenn séu að spila reglulega. Það skiptir hana náttúrulega miklu máli bara upp á hennar farmför að gera að hún sé að spila reglulega. Vonandi vinnur hún sig inn í þetta. Það er mikil samkeppni hjá Bayern Munchen og ef hún kemst í gegnum hana þá er það frábært,“ sagði Þorsteinn Halldórsson, landsliðsþjálfari íslenska kvennalandsliðsins í knattspyrnu á blaðamannafundi í dag.

Karólína gekk til liðs við Bayern Munchen frá Breiðablik á þessu ári. Hún skrifaði undir þriggja og hálfs árs samning við þýska liðið. Karolína er uppalin hjá FH en hún gekk til liðs við Breiðablik árið 2017. Hún á að baki 78 leiki í efstu deild hér á landi og 9 A-landsleiki.