Heimir Guðjónsson þjálfari Vals segir að málefni Hannesar Halldórssonar verði ekki leyst í fjölmiðlum. Hannes steig fram í viðtali í gær og sagði að Heimir vildi losna við sig frá félaginu.

Valur hefur samið við Guy Smit sem kemur til félagsins frá Leikni. Hollenski markvörðurinn átti gott sumar í Efra-Breiðholti í sumar.

„Þetta mál verður bara leyst innan Vals. Þetta mál verður ekki leyst í fjölmiðlum eins og sumir halda,“ sagði Heimir í samtali við 433.is í dag en að öðru leyti vildi hann ekki tjá sig um málið.

Hannes var að klára sitt þriðja tímabil á Hlíðarenda en hann á ár eftir af samningi sínum við félagið. Ef ekkert félag reynir að kaupa Hannes frá Val má búast við því að hann klári sinn samning hjá félaginu.

„Ég get alveg sagt eins og er og sagt hlutina eins og þeir eru. Ég veit að þjálfarinn vill ekki hafa mig hjá félaginu og ég hef hvorki heyrt hóst né stunu frá félaginu síðan mér var tilkynnt það. Ég veit ekki hvers vegna eða hvernig menn hyggjast leysa þá stöðu. Ég er steinhissa á þessari stöðu.“ sagði Hannes á K100 í gær.

Hannes veit ekki hvernig málið leyist. „Ég veit ekki hvernig á að leysa þetta vegna þess að ég heyri ekki neitt. Eina sem ég veit er að þjálfarinn hyggst ekki nota mig en það er ákveðin pattstaða sem er komin upp. Ég á eitt ár eftir af samningi og hafði ekkert hugsað mér að hætta í fótbolta og sérstaklega ekki svona. Ég sit og bíð. Fyrsta æfing hjá Val er 10. nóvember og ég er bara að fara að mæta á hana.“

Hannes Þór gapandi hissa og heyrir hvorki hóst né stunu: „Heimir vill ekki hafa mig“