Manchester United hefur staðfest kaup sín á Maríu Þórisdóttir sem kemur til félagsins frá Chelsea. Þessi norska landsliðskona á ættir sínar að rekja til Íslands.
Faðir Maríu er hinn íslenski handboltaþjálfari, Þórir Hergeirsson. María ólst upp í Noregi en hefði getað kosið að spila fyrir Ísland.
María er 27 ára gömul og er fyrsti Íslendingurinn til að ganga í raðir Manchester United.
María gerir samning til ársins 2023 við United með möguleika á auka ári. María hefur leiið 46 landsleiki fyrir Noreg.
„Ég er stolt af því að ganga í raðir Manchester United,“ sagði María en liðið er á toppi deildarinnar, ásamt Chelsea þar sem María lék áður.
„Ég hef hrifist af því hvernig liðið hefur þróast á skömmum tíma og hef heyrt svo marga góða hluti um þjálfarann (Casey Stoney). Ég get ekki beðið eftir því að byrja að vinna með henni. Ég er spennt fyrir því að kynnast liðsfélögum mínum. Framtíðin er björt hérna.“
