Stuðningsmaður Manchester United hringdi inn í símatíma útvarpsstöðvarinnar TalkSport á dögunum og lýsti því hvernig Ole Gunnar Solskjær, knattspyrnustjóri Manchester United, hefði hjálpað sér að glíma við erfiðar aðstæður.
„Ég hef átt erfitt mjög, mjög lengi, með andlega heilsu mína, kvíða, þunglyndi og sjálfsvígshugsanir. Hef alltaf átt erfitt uppdráttar í lífinu og verið að glíma við djöfla. Manchester United og Andy’s Man Club, hafa hjálpað mér að snúa við mínu lífi. Ég vakna suma morgna vitandi það að United er að spila og verð góður,“ sagði Ryan við umsjónarmenn þáttarins Sports Bar á Talksport.
Andy’s Man Club, hópurinn sem Ryan nefndi, eru góðgerðasamtök sem voru stofnuð til minningar um Andy Roberts, sem tók líf sitt aðeins 23 ára að aldri. Samtökin hafa hjálpað Ryan mikið.
Þá vildi Ryan sérstaklega þakka Ole Gunnar Solskjær, knattspyrnustjóra félagsins fyrir.
„Solskjær hefur gefið mér svo mikið hugrekki, það er ótrúlegt. Ég hef haft trú á honum frá fyrsta degi, ég er stoltur og ánægður með það hvernig hlutirnir eru að þróast hjá félaginu,“ sagði Ryan í þættinum Sports Bar.
Manchester United hefur heldur betur þurft að venjast öðru gengi en þegar að Sir Alex Ferguson, var knattspyrnustjóri liðsins. Liðinu hefur hins vegar gengið vel á tímabilinu og er á toppi ensku úrvalsdeildarinnar um þessar mundir.
