Spánarmeistarar Real Madrid, töpuðu í kvöld fyrir C-deildar liði Alcoyano í framlengdum leik í spænska bikarnum. Real Madrid er þar með dottið úr leik í bikarnum.
Eder Militao, kom Real Madrid yfir með marki eftir stoðsendingu frá Marcelo á 45. mínútu.
Þannig stóðu leikar allt þar til á 80. mínútu þegar að Jose Solbes, jafnaði metin fyrir Alcoyano.
Fleiri mörk voru ekki skoruð í venjulegum leiktíma og því þurfti að framlengja.
Í framlengingunni fékk Ramon Lopez, leikmaður Alcoyano að líta sitt annað gula spjald í leiknum og var þar með rekinn af velli með rautt spjald.
Það kom hins vegar ekki í veg fyrir að leikmenn Alcoyano myndu finna sigurmark leiksins. Á 115. mínútu skoraði Juanan annað mark Alcoyano í leiknum og tryggði liðinu sigur.
Hreint út sagt ótrúleg úrslit sem þýða að Real Madrid er dottið úr leik í spænska bikarnum. Alcoyano heldur áfram í næstu umferð keppninnar.
