Brentford tók á móti Liverpool í lokaleik dagsins í ensku úrvalsdeildinni.

Fyrri hálfleikur var fjörugur. Brentford veitti Liverpool svo sannarlega alvöru mótspyrnu.

Ethan Pinnock kom heimamönnum yfir á 27. mínútu. Diogo Jota var þó ekki lengi að svara með jöfnunarmarki. Hann skallaði sendingu Jordan Henderson í netið.

Á 54. mínútu kom Mohamed Salah Liverpool yfir. Fabinho sendi boltann þá inn fyrir á Egyptann sem skoraði.

Tæpum tíu mínútum síðar jafnaði Vitaly Janelt fyrir Brentford. Hann skallaði boltann þá að marki, Trent Alexander-Arnold sparkaði boltanum í burtu en hann var klárlega kominn yfir marklínuna.

Fjörið var ekki búið. Curtis Jones kom Liverpool aftur yfir á 67. mínútu. Skot hans fór þá af varnarmanni Brentford og í netið.

Yoane Wissa jafnaði aftur fyrir nýliðanna á 82. mínútu með góðri afgreiðslu.

Ivan Toney hélt að hann væri að tryggja Brentford sigur þegar hann kom boltanum í netið á 87. mínútu. Hann var þó flaggaður rangstæður. Lokatölur 3-3.

Liverpool er á toppi deildarinnar með 14 stig eftir sex leiki, stigi á undan Chelsea og Manchester City.

Brentford er í níunda sæti með 9 stig. Fínasta byrjun hjá þeim.