Hörður Magnússon, íþróttalýsandi með meiru, segir að Arnar Þór Viðarsson, þjálfari íslenska karlalandsliðsins, hefði getað staðið sig betur í vissum þáttum þrátt fyrir að mikið hafi gengið á í hans tíð hjá liðinu.
Arnar tók við í lok síðasta árs. Gengið hefur verið slakt á knattspyrnuvellinum frá komu hans. Þá hafa meint kynferðisbrot landsliðsmanna og þöggun íslenska Knattspyrnusambandsins í tengslum við þau vakið upp harða gagnrýni. Guðni Bergsson sagði á dögunum af sér sem formaður sambandsins vegna stöðu mála, það gerði stjórnin sömuleiðis.
,,Arnar dró stysta stráið, mögulega, þegar hann varð landsliðsþjálfari, það sem að hann er búinn að þurfa að ganga í gegnum og annað. Að mínu mati hefur hann samt ekki alveg hjálpað sjálfum sér. Hann talar of mikið um það sem er að gerast innan liðsins. Af hverju er þessi ekki valinn og hinn? Hann er að svara því. Þú þarft ekkert að svara því. Eins og með Viðar Örn Kjartansson í fyrsta landsliðshópnum. Hann er inni í myndinni, hann er ekki valinn núna. Punktur, næsta mál,“ sagði Hörður í hlaðvarpsþættinum Dr. Football í dag.
Arnar opnaði sig um það að hann hafi öskrað á landsliðið í hálfleik er liðið var 0-1 undir gegn Norður-Makedóníu í undankeppni Heimsmeistaramótsins á sunnudag. „Ég öskraði svo mikið að ég missti röddina, ég öskraði í einhverjar þrjár mínútur og svo gekk ég út og Eiður Smári tók við. Ég hef aldrei verið svona reiður. Ég lofaði sjálfum mér að ég ætlaði ekki að vera þessi þjálfari en ég tapaði þeirri baráttu,“ sagði Arnar Þór á fréttamannafundi.
Hörður segir þessar upplýsingar til að mynda eiga heima innan liðsins.
,,Það kemur engum við að Arnar hafi tekið eitthvað brjálæðiskast í hálfleik á móti Norður-Makedóníu, það á bara að vera inni í klefanum.“
