Vegnar reglna um sóttkví á Englandi mun Manchester United þurfa að bíða aðeins lengur með það að kynna Raphael Varane til leiks sem nýjan leikmann liðsins. Fabrizio Romano greinir frá.
Hinn 28 ára gamli Varane er að ganga í raðir Man Utd frá Real Madrid. Kaupverðið er talið vera rúmar 40 milljónir punda. Hann mun gera fjögurra ára samning við enska félagið.
Þar sem leikmaðurinn þarf að fara í sóttkví er ólíklegt að það takist að kynna hann til leiks sem nýjan leikmann Man Utd í þessari viku. Það mun líklegast gerast í þeirri næstu.
Romano ítrekar þó að félagaskiptin séu hundrað prósent frágengin. Frestunin er aðeins vegna reglna um sóttkví.
Franski miðvörðurinn hefur verið hjá Real Madrid í áratug. Með félaginu hefur hann orðið Spánarmeistari þrisvar og Evrópumeistari fjórum sinnum.
Þá varð Varane heimsmeistari með franska landsliðinu árið 2018.
