Portúgalska stórstjarnan Cristiano Ronaldo verður að öllum líkindum áfram hjá Juventus á Ítalíu á næstu leiktíð. Sky Sports greinir frá þessu.
Hinn 36 ára gamli Ronaldo þénar um 30 milljónir evra á ári hjá Juve, tæplega 4,5 milljarða íslenskra króna. Samningur hans rennur út næsta sumar. Juve mun því taka áhættuna á að missa hann frítt næsta sumar, verði leikmaðurinn áfram án þess að skrifa undir nýjan samning.
Ronaldo gerði 29 mörk í 33 leikjum í ítölsku Serie A á síðustu leiktíð.
Það kemur einnig fram í fréttinni að miðvörðurinn Giorgio Chiellini muni skrifa undir nýjan samning við Juve.
Samningur hins 36 ára gamla Chiellini rann út fyrr í sumar. Hjá Juve eru menn þó bjartsýnir á það að hann verði áfram í röðum félagsins.
