Tyrkneska félagið Adana Demirspor hefur áhuga á því að næla í brasilíska miðvörðinn David Luiz.
Hinn 34 ára gamli Luiz hefur verið samningslaus frá því að samningur hans við Arsenal rann út í lok júní. Hann hafði verið á mála hjá félaginu frá sumrinu 2019. Þar áður lék hann með Chelsea.
Adana Demirspor er nýliði í efstu deild Tyrklands eftir að hafa komið sér upp úr B-deildinni í vor.
Félagið hefur metnað til að gera vel og hefur sýnt það á félagaskiptamarkaðnum. Mario Balotelli gekk til liðs við Adana Demirspor fyrr í sumar.
Það yrði ansi áhugavert að sjá Balotelli og Luiz í sama liðinu. Báðir eiga þeir það sameiginlegt að vera litríkir karakterar. Það verður þó ekki af þeim tekið að þegar þeir sýna sínar réttu hliðar á knattspyrnuvellinum geta þeir verið ansi öflugir.