Ryan Giggs fór fyrir rétt í dag. Þar kom fram að hann hafi sparkað í bakið á fyrrverandi kærustu sinni og hent henni nakinni út af hótelherbergi í eitt skipti.

Þessi 47 ára gamla Manchester United-goðsögn er sakaður um að hafa beitt fyrrverandi kærustu sína, Kate Greville, ofbeldi í um þrjú ár.

Ofbeldið er talið hafa verið af bæði andlegum og líkamlegum toga. Þá var Giggs einnig sakaður um að hafa beitt yngri systur Kate, Emma, líkamlegu ofbeldi þann 1. nóvember í fyrra.

Í réttarsal í dag kom fram að þegar Kate og Giggs höfðu rifist á hóteli í Lundúnum, í kjölfar þess að Kate sakaði fyrrum knattspyrnumanninn um að reyna við aðrar konur, hafi Giggs sparkað í bakið á henni og hent henni nakinni út af herbergi þeirra. Hann hafi í kjölfarið kastað töskunni hennar í hana.

Giggs er einnig sakaður um að hafa hótað því að senda vinum Kate og yfirmönnum hennar upplýsingar um kynferðislegt samband þeirra.

Þá á Giggs að hafa mætt óboðinn heim til Kate, í líkamsræktarsalinn sem hún notaði og á vinnustað hennar eftir að hún hafði reynt að slíta sambandi þeirra.

Giggs neitar ásökununum alfarið.