Valur átti ekki góðan leik gegn Bodo/Glimt í forkeppni Sambandsdeildar UEFA í gær. Liðið tapaði fyrri leiknum á heimavelli 0-3. Valur var til umræðu í hlaðvarpsþættinum Dr. Football í gærkvöldi.

,,Þetta eru tvö færi í fyrri hálfleik sem maður sér og það kemur upp úr einhvers konar einstaklingsframtökum frá Kidda (Kristni Frey Sigurðssyni) og Guðmundi Andra,“ sagði Jóhann Skúli Jónsson í þættinum.

Arnar Sveinn Geirsson, formaður leikmannasamtakanna og fyrrum leikmaður Vals, var allt annað en hrifinn af sínu gömlu liðsfélögum í gær.

,,Þegar Andri Adolphsson kemur inn á, það kemur einhver orkar með honum, að öðru leyti er þetta bara ótrúlega flatt, þetta er bara vond frammistaða hjá þessu Valsliði.“

Arnar Sveinn hélt áfram og sagðist ekki hafa heillast af Val heilt yfir í sumar.

,,Í rauninni kemur mér það ekkert á óvart. Þeir áttu fínan leik á móti Dinamo Zagreb á heimavelli. Það var góður kraftur í þeim þar og voru bara flottir. En mér finnst þetta bara vera framhald af því sem við erum búin að sjá í leikjunum hjá þeim í sumar. Þeir eru að spila ótrúlega neikvæðan fótbolta. Ég man ekki eftir að hafa setið eftir Valsleik og hugsað ‘djöfull var þetta Valslið gott’.“