Þjálfarinn Daniel Farke hefur skrifað undir nýjan fjögurra ára samning við úrvalsdeildarlið Norwich City en þetta kom fram á heimasíðu félagsins.

Farke tók Norwich upp um deild í annað sinn í fyrra og skrifaði undir nýjan samning sem gildir til sumars 2025. Aðstoðarþjálfari liðsins, Eddie Riemer hefur einnig skrifað undir nýjan samning við félagið sem og aðrir þjálfarar liðsins þeir Chris Domogalla og Christopher John.

„Ég er upp með mér á þessari stundu. Ég er gríðarlega þakklátur fyrir traustið og stuðninginn. Það er mér ánægja að starfa með þessu einstaka félagi og eigendum, Delia og Michael. Nú þurfum að taka næsta skref og gera allt sem við getum til að gera Norwich að úrvalsdeildarliði til margra ára,“ sagði Farke.

„Við erum í miklu betri stöðu núna bæði sem félag og sem hópur, og við viljum halda áfram að byggja eitthvað einstakt.“

Farke hefur tvisvar sinnum unnið Championship deildina með Norwich, fyrst með 94 stig, en liðið féll strax niður um deild tímabilið á eftir. Í fyrra vann hann svo aftur deildina þá með 97 stig sem er met.

„Ein af ástæðunum fyrir því að ég skrifaði undir eru fyrstu fjögur ár mín hjá félaginu. Blóð mitt er nú þegar gult ef ég segi eins og er, og mér líður eins og heima hjá mér. Ég fæ það líka á tilfinninguna að verki okkar sé ólokið,“ sagði Þjóðverjinn í viðtali.