Þórir Jóhann Helgason vildi ekki svara svara spurningu blaðamanns Fótbolta.net er hann var spurður út í samningsmál sín hjá FH.
Samningur Þóris rennur út eftir tímabilið. Miðjumaðurinn öflugi hefur til að mynda verið orðaður við Val og Breiðablik.
,,Ég vil ekkert ræða það,“ sagði Þórir er hann var spurður út í stöðuna á samningsmálum sínum eftir sigur FH á Sligo Rovers í Sambandsdeild UEFA í gær.
Fótbolti.net ræddi einnig við Davíð Þór Viðarsson, aðstoðarþjálfara FH, eftir leik.
„Það er bara í ferli. Þórir Jóhann er einn allra besti leikmaðurinn okkar og leikmaður sem við viljum mjög mikið halda. Vonandi klárum við það mál á næstu dögum. En það er engin spurning að við höfum gríðarlega mikinn áhuga á að halda honum innan okkar raða,“ sagði Davíð.
