Víkingur Reykjavík hefur gefið Andra Rúnari Bjarnasyni samningstilboð en framherjinn gæti verið á heimleið. Frá þessu var sagt í Dr. Football.

Andri Rúnar er samningsbundinn Esbjerg í Danmörku en átti erfitt uppdráttar á sínu fyrsta tímabili þar á bæ. Andri var talsvert meiddur og fann ekki markaskóna.

Andri Rúnar jafnaði markametið í efstu deild karla á Íslandi árið 2017 þegar hann skoraði 19 mörk fyrir Grindavík.

Hrafnkell Freyr Ágústsson sérfræðingur Dr. Football fór yfir mál Andra í þætti dagsins, honum svelgdist á kaffinu þegar hann heyrði launatölurnar. „Ég myndi segja það, þegar maður heyrði tölurnar,“ sagði Hrafnkell í þætti dagsins.

Andri Rúnar er að hugsa sín mál en sagt er að Esbjerg sé tilbúið að láta hann fara.

„Það hefur ríkur einstaklingur Fossvoginum tekið upp heftið, skrifað tölu niður á blað fyrir Andra Rúnar. Hann er að hugsa sig um.“

Fram kom að ÍBV í Lengjudeildinin hefði boðið Andra samning en hann ku hafa hafnað því.