Eitthvað hefur verið rætt og ritað um slæmt andrúmsloft innan leikmannahóps Selfyssinga undanfarið. Umræðan spratt aðallega upp í kjölfar þess að Hrvoje Tokic, leikmaður liðsins, urðaði yfir liðsfélaga sinn, Þór Llorens Þórðarson, eftir sigurleik liðins gegn Kórdrengjum á dögunum. Andrúmsloft innan hópsins hjá Selfossi var til umræðu í markaþætti Lengjudeildarinnar á Hringbraut og 433.is í gær.

,,Ég hef rætt við Selfyssinga og þeir segja að litlir fuglar séu að hvísla því, á Selfossi, að það sé ekkert mögnuð stemmning í hópnum. Það sé smá pirringur þarna á milli,“ sagði Hrafnkell Freyr Ágústsson, sérfræðingur í þættinum.

Selfoss tapaði gegn Þrótti Reykjavík í 3. umferð Lengjudeildarinnar á dögunum. Dean Martin, þjálfari liðsins, virtist mjög ósáttur með sína menn eftir leik. Selfoss er með 3 stig af 9 mögulegum. Hrafnkell skilur pirring Dean Martin vel.

,,Þeir eru búnir að vera að æfa á morgnanna í vetur, jafnvel seinni partinn líka svo ég skil Dean Martin mjög vel. Hann vill sjá miklu meira frá sínu liði.“

Selfoss teflir fram sterku liði í Lengjudeildinni í ár. Þeir eru til að mynda með áðurnefndan Tokic í framlínunni ásamt Gary Martin.

,,Við höfum séð Tokic og Gary lengi í íslenska boltanum. Með fullri virðingu fyrir þeim, kannski ekki bestu mennirnir í mótlæti,“ sagði Hörður Snævar Jónsson, þáttastjórnandi.

Hrafnkell tók í sama streng. ,,Nei, þeir eru það ekki og þú vilt helst hafa þá í bullandi meðbyr en ekki í mótlæti. Þeir þurfa einhvern veginn að sjatla málin þarna, Selfyssingarnir bara almennt og bara koma upp einhverri stemmningu í þetta lið. Þetta gengur ekki.“

Umræðuna um Selfoss, sem og markaþátt Lengjudeildarinnar í heild sinni, má sjá hér fyrir neðan.