Chelsea vann í kvöld 2-0 útisigur á Porto í 8-liða úrslitum Meistaradeildar Evrópu. Um var að ræða fyrri leik liðanna en seinni leikurinn fer fram þann 13. apríl næstkomandi.
Thomas Tuchel, knattspyrnustjóri Chelsea, var að vonum ánægður í leikslok.
„Þetta var erfiður leikur á móti sterku liði Porto. Það voru margir í kaflar í leiknum þar sem okkur gekk erfiðlega en við mættum því. Umhverfið er öðruvísi í 8-liða úrslitum, en andinn í hópnum var góður og þetta voru frábær úrslit fyrir okkur,“ sagði Tuchel eftir leik.
Chelsea tapaði gegn West Brom í ensku úrvalsdeildinni um síðastliðna helgi. Tuchel hafði ekki áhyggjur af neikvæðum áhrif þess leiks fyrir leik kvöldsins, hann vissi að liðið myndi bregðast við.
„Ég var nokkuð viss um það. Ég sá strax viðbrögð frá þeim í búningsherberginu eftir leik og daginn eftir. Þetta var ekki mikið áhyggjuefni fyrir okkur, við vorum tilbúnir til að svara fyrir okkur. Í íþróttum muntu alltaf lenda í skakkaföllum en aðal spurningin er hvernig þú bregst við,“ sagði Tuchel.
Tuchel segir að liðið hafi gengið í gegnum margt saman.
„Við höfum upplifað mögnuð úrslit saman en við höfum einnig tapað saman og brugðist við saman eftir tap. Það færir okkur nær hvor öðrum og byggir upp traust.“
Mason Mount skoraði fyrsta mark leiksins en þetta var einnig hans fyrsta mark í Meistaradeild Evrópu.
„Ég er mjög ánægður með að hann skyldi skora. Þetta er mikilvægt mark sem opnaði leikinn og róaði taugarnar. Þetta var ekki auðvelt skot en mjög nákvæmt, ég er mjög ánægður fyrir hönd Mason, hann tók ábyrgð,“ sagði Tuchel um frammistöðu Mason Mount í leiknum.
