Mino Raiola, umboðsmaður Erlings Braut Haaland, framherja Dortmund, segir að aðeins örfá lið hafi efni á því að fá leikmanninn til liðs við sig. Haaland, hefur slegið í gegn með Dortmund og var meðal annars valinn besti ungi leikmaður Evrópu árið 2020.
„Það eru aðeins tíu félög í mesta lagi sem hafa efni á því að kaupa Haaland og gefa honum þann grundvöll sem hann vill eftir að hafa verið hjá Dortmund. Fjögur af þeim eru á Englandi,“ sagði Raiola í ítarlegu viðtali sem birtist á vefsíðu BBC.
Raiola er fullviss um að Haaland verði stjarna líkt og leikmenn á borð við Messi, Ronaldo og Ibrahimovic.
„Hann verður ein af þessum framtíðarstjörnum. Við sjáum að leikmenn á borð við Messi, Ronaldo og Ibrahimovic eru að komast á þann aldur að allir fara að spurja sig ‘hversu lengi getum við notið þess að horfa á þá spila knattspyrnu?’ Þannig að allir eru farnir að horfa eftir og leita að næstu stjörnunum,“ sagði Mino Raiola.
Haaland hefur spilað 43 leiki fyrir Dortmund frá því að hann gekk til liðs við félagið frá Red Bull Salzburg. Í þessum 43 leikjum hefur hann skorað 43 mörk og gefið 10 stoðsendingar.
