Freyr Alexandersson, aðstoðarþjálfari Heimis Hallgrímssonar hjá Al-Arabi, mun stýra liðinu í leik gegn toppliði Al-Sadd í katörsku úrvalsdeildinni á mánudaginn.

Heimir getur ekki stýrt Al-Arabi í næstu leikjum eftir að hafa greinst með Covid-19 á dögunum.

„Við munum klárlega sakna Heimis vegna þess að hann hefur frábæra nærveru. Við höfum reynt að hafa undirbúninginn fyrir leikinn eins venjulegan og kostur er á,“ sagði Freyr á blaðamannafundi fyrir leikinn.

Hann segir að nú sé það undir leikmönnum komið að sanna sig.

„Þetta er gott tækifæri fyrir leikmennina til að sýna leiðtogahæfni sína. Það verða ekki stórvægilegar breytingar en fjarveru Heimis mun gæta. Við vonumst til að hann snúi aftur sem fyrst,“ sagði Freyr Alexandersson, aðstoðarþjálfari Al-Arabi.

Liðið hefur verið á góðu skriði síðustu vikur en eftir erfiða byrjun í deildinni hefur liðið náð vopnum sínum. Al-Arabi er sem stendur í 6. sæti deildarinnar með 23 stig eftir 16 leiki.

Freyr bættist við þjálfarateymi Heimis hjá Al-Arabi eftir að hafa lokið starfi sínu sem aðstoðarlandsliðsþjálfari íslenska karlalandsliðsins sem lék á þeim tíma undir stjórn Erik Hamrén.