Jesse Lingard miðjumaður Manchester United hefur áhuga á að yfirgefa félagið nú í janúar ef fleiri tækifæri fara ekki að koma á borð hans. Lingard hefur aðeins spilað þrjá leiki á þessu tímabili.
Lingard er 28 ára gamall og vill spila fótbolta nú þegar hann er á besta aldri. United nýtti sér ákvæði í samningi Lingard og framlengdi hann til 2022.
Samkvæmt frétt ESPN hafa Lingard og Ole Gunnar Solskjær fundað um málið, stjórinn vill helst halda Lingard. Ástæðan er mikið leikjaálag á næstunni.
Samkvæmt frétt ESPN hafa Marseille, Porto, Inter Milan, Nice, Tottenham Hotspur, Sheffield United og West Ham United öll spurst fyrir um Lingard. Jose Mourinho, stjóri Tottenham hefði áhuga á að vinna aftur með Lingard.
Búist er við að nokkrir leikmenn fari frá United í janúar en félagið seldi Timothy Fosu-Mensah til Leverkusen á dögunum. Þá hefur Solskjær gefið út að bæði Marcos Rojo og Sergio Romero geti farið í janúar.
