Aron Einar Gunnarsson, fyrirliði íslenska landsliðsins var í ítarlegu viðtali sem birtist á heimasíðu Alþjóða knattspyrnusambandsins (FIFA).

Aron Einar segir í viðtalinu að hungrið sé enn til staðar hjá leikmönnum íslenska landsliðsins sem séu staðráðnir í að komast á annað stórmót.

„Erum við ennþá hungraðir? Ég fæ þessa spurningu mjög oft og svarið hjá mér er klárt já. Við náðum að skrifa okkur á spjöld sögunnar með því að komast á EM og HM en þegar að maður hefur upplifað þessa hluti vill maður bara upplifa þá aftur og aftur,“ sagði Aron Einar í viðtalinu.

Arnar Þór Viðarsson og Eiður Smári Guðjohnsen, voru í byrjun desember ráðnir landsliðs- og aðstoðar landsliðsþjálfarar. Fyrsta verkefni þeirra með íslenska landsliðið verður í undankeppni HM sem hefst í mars.

„Nú eru komnir nýjir þjálfarar inn og ég tel okkur eiga raunhæfa möguleika á því að komast á HM. Þýskaland eru líklegasta liðið í riðlinum og siðan eru þarna lið eins og Rúmenía, Norður-Makedónía, Armenia og Liechtenstein. Ég er vongóður fyrir keppnina og strákarnir eru staðráðnnir í því að komast aftur á HM. Margir af okkur leikmönnunum eru í kringum 30 ára aldurinn og vita að þetta gæti mögulega verið okkar seinasta tækifæri,“ sagði Aron Einar Gunnarsson, landsliðsfyrirliði Íslands.

Fyrsti leikur Íslands í undankeppni HM verður þann 25. mars næstkomandi á útivelli gegn Þýskalandi.

Viðtalið við Aron Einar í heild sinni má lesa hér.