Jesse Lingard gæti verið að yfirgefa herbúðir Manchester United en franska félagið, Nice reynir að fá hann á láni frá félaginu.

Lingard er með samning til 2022 við United en hann hefur ekki fengið tækifæri í byrjunarliði félagsins í ensku úrvalsdeildinni, á þessari leiktíð.

Lingard byrjaði í sigri liðsins á Watford í enska bikarnum um liðna helgi. Hann virðist ekki vera í neinum plönum Ole Gunnar Solskjær.

Samkvæmt frétt Sky Sports er búist við því að Nice leggi fram formlegt tilboð á næstu dögum, óvíst er hins vegar hvort Manchester United sé tilbúið að lána hann.

Enska félagið hefur áhuga á að selja Lingard en lán til Frakklands gæti verið lausn fram á sumarið og þá gæti eitthvað félag haft áhuga á að kaupa Lingard.