Meiðsli Gabriel Martinelli, kantmanns Arsenal, eru ekki eins slæm og óttast var. Martinelli meiddist fyrir leik Arsenal og Newcastle United í enska bikarnum um síðastliðna helgi. Greint var frá þessu á heimasíðu Arsenal í dag.

Stutt er síðan Martinelli, sneri aftur á knattspyrnuvöllinn eftir að hafa glímt við erfið meiðsli í hné sem héldu honum frá knattspyrnuiðkun í meira en ár.

Óttast var að Martinelli hefði meiðst aftur á hné en í ljós kom að hann sneri upp á ökkla í upphitun fyrir leikinn gegn Newcastle. Leikmaðurinn var mikið kvalinn þegar hann meiddist um síðastliðna helgi.

Leikmaðurinn mun ekki geta tekið þátt í leik Arsenal gegn Crystal Palace á fimmtudaginn en búist er við því að hann snúi fljótlega aftur til æfinga og verði til taks er Arsenal mætir Newcastle næstkomandi mánudag.