Aron Jóhannsson leitar sér að nýjum vinnuveitandi en hann ákvað að rifta samningi sínum við Hammarby í Svíþjóð á dögunum. Eftir gott gengi í Svíþjóð leitar Aron nú að nýju tækifæri í heimi fótboltans.

Aron gerir upp feril sinn í Draumaliðinu, hlaðvarpsþætti Jóhanns Skúla. Aron fer yfir marga af sínum mögnuðu samherjum en Aron leikur fyrir landslið Bandaríkjanna eftir að hafa fæðst í landi þeirra frjálsu og hugrökku.

Aron rifjar upp margar góðar sögur af ferli sínum og ein af þeim tengist Jannik Vestergaard, varnarmanni Southampton í ensku úrvalsdeildinni. Aron og Vestergaard léku saman hjá Werder Bremen í Þýskalandi.

„Hann er tröll,“ segir Aron um þennan danska varnarmann þegar hann rifjar upp sögu af Jannik Vestergaard sem 199 sentímetrar á hæð.

„Ég man þegar ég kom til Bremen og í fyrstu vikunni. Ég talaði dönsku og þá gat ég spjallað við hann, síðan klobbaði ég hann í reitabolta í fyrstu vikunni.“

Aron hefði líklega betur sleppt því að klobba danska tröllið. „Hann horfði á mig og sagði á dönsku ´Aron ef þú gerir þetta aftur, þá brýt ég á þér lappirnar´. Ég sprakk úr hlátri og hélt að hann væri að grínast, hann horfði á mig svo alvarlegur í andlitinu. Ég var bara, sjitt.“

Vestergaard er að standa sig frábærlega í enska boltanum í dag og Aron segir hann geta náð enn lengra. „Hann er að standa sig fáránlega vel, hann er mjög góður í fótbolta. Hann er stór og algjör vél.“