Íþróttahreyfingin á Íslandi óttast að keppnisíþróttir fái ekki að fara af stað þann 13 janúar. Núgilandi sóttvarnareglur falla úr gildi 12 janúar, óvíst er hvað tekur við og hefur Þórólfur Guðnason lítið vilja segja. Hann mun á næstu dögum skila inn minnisblaði til ráðherra, sóttvarnalæknir leggur til aðgerðir og það er svo Svandís Svavarsdóttir, ráðherra sem tekur ákvörðun um málið.

Magnús Már Einarsson ritstjóri Fótbolta.net spurði Þórólf um málið á upplýsingafundi dagsins, hvort möguleiki væri á að kappleikir færu af stað á næstunni.

„Já, við erum í stöðugu sambandi við marga aðila. Erum að gera okkar besta að halda þessum faraldri niðri og hafa aðgerðirnar ekki of íþyngjandi. Stöðug áskorun og mun ekkert lagast á næstunni,“ sagði Þórólfur.

Hann vildi ekki segja til um hvort keppnisíþróttir færu af stað á næstunni. „Við verðum að fara mjög varlega varðandi keppnisíþróttir eins og allt annað,“ sagði Þórólfur.

Svör Þórólfs hræða marga:

Ekki hefur mátt keppa í íþróttum á Íslandi síðustu mánuði, Ísland er eitt fárra landa sem hefur lagt blátt bann á keppnisíþróttir. „Það voru köld svör sem Magnús Már fékk frá sóttvarnarlækni varðandi hvort keppni í íþróttum gæti farið aftur af stað í næstu viku. Úff,“ skrifar Jón Júlíus Karlsson, framkvæmdarstjóri Grindavíkur um svör Þórólfs.

Guðjón Guðmundsson, sjálfur Gaupi tekur í sama streng og segir. „Maður hefur á tilfinningunni að hann Þórólfur ætli sér ekki að opna á keppni íþróttamanna hér á landi. Því miður. Hann hefur verið á villigötum hvað þetta varðar í langan tíma. En þá má víst ekki hafa þessa skoðun. Góða fólkið.Eina.“

Jón Júlíus heldur síðan áfram og segir að eitthvað þurfi að gera til þess að íþróttafólk geti farið að stunda sína iðju. „Nú þarf að setja alvöru pressu á ráðamenn. Allir í bátanna. Ótrúleg staða en ég held að það þurfi alvöru lobbyisma til að ýta þessu yfir línuna.“