Lögreglan á Ítalíu rannsakar það nú hvort Luis Suarez hafi svindlað á prófi þar í landi til að reyna að fá ítalskt vegabréf. Suarez vildi komast til Juventus en fær það ekki í gegn. Suarez reynir nú að komma sér frá Barcelona en félagið vill losna við hann.
Suarez þurfti ítalskt vegabréf til þess að eiga möguleika á að komast til Juventus en framherjinn frá Úrúgvæ er nú sakaður um svindl.
Suarez flaug til Perugia í síðustu viku og fór í próf í ítölsku, það átti að hjálpa honum til að flýta fyrir því að fá vegabréfið. Suarez náði prófinu með glans en yfirvöld þar í landi telja að hann hafi svindlað.
„Hann talar ekki ítölsku, ekki eitt einasta orð. EF blaðamenn myndu reyna að tala við hann á tungumáli okkar, þá gæti hann ekki sagt eitt einasta orð,“ sagði embættismaður þar í landi.
Suarez er sagður hafa vitað spurningarnar og svörin áður en hann fór í prófin og gat því undirbúið sig. Lögreglan er með málið til rannsóknar og gæti Suarez fengið þunga refsingu takist að sanna sekt hans.
Suarez er nú líklega á leið til Atletico Madrid en Juventus er hætt við að fá hann og er að fá Alvaro Morata frá Atletico Madrid.