Þrír leikir voru að klárast í Pepsi-Max deild karla. Valur átti ekki í neinum vandræðum með Stjörnuna, 1-5 sigur Valsmanna staðreynd. KR-ingar fóru með öll stigin heim í Vesturbæinn eftir 0-2 sigur á Breiðablik. FH vann Fylki síðan í Árbænum, lokatölur 1-4.
Stjörnumenn áttu engin svör gegn Valsmönnum á Samsung-vellinum í kvöld. Markaveislan hófst á 3. mínútu þegar að Patrick Pedersen skoraði fyrsta mark Vals. Patrick Pedersen var síðan aftur á ferðinni á 17. mínútu er hann tvöfaldaði forystu Valsmanna með marki úr vítaspyrnu.
Á 20. mínútu var röðin síðan komin að Aroni Bjarnasyni sem komst einn á móti Haraldi Björnssyni, markmanni Stjörnunnar eftir sendingu frá títtnefndum Patrick Pedersen og kláraði færið af öryggi. Staðan orðin 0-3 eftir aðeins tuttugu mínútna leik.
Valsmenn voru engan veginn hættir að skora. Aron Bjarnason var aftur á ferðinni á 31. mínútu. Aftur var það Patrick Pedersen sem átti sendingu inn fyrir vörn Stjörnunnar, Aron var fyrstur að ná til knattarins og skoraði fjórða mark Valsmanna.
Tveimur mínútum síðar bætti Birkir Már Sævarsson við fimmta marki Vals eftir laglegt samspil við Aron Bjarnason. Staðan þegar flautað var til leikhlés var 0-5 fyrir Val, hreint út sagt lygilegar tölur.
Sölvi Snær Guðbjargarson minnkaði muninn fyrir Stjörnumenn á 62. mínútu. Nær komust Stjörnumenn þó ekki. 1-5 stórsigur Valsmanna því staðreynd.
Valur er eftir leikinn í 1. sæti deildarinnar með 37 stig eftir 15 leiki. Stjarnan er í 3. sæti með 24. stig eftir 13 leiki.
Á Kópavogsvelli áttust við heimamenn í Breiðablik og KR. Ægir Jarl Jónasson kom KR-ingum yfir á 10. mínútu leiksins. Á 84. mínútu varð Viktor Örn Margeirsson, leikmaður Breiðabliks, fyrir því óláni að skora sjálfsmark.
Lokatölur á Kópavogsvelli 0-2 sigur KR-inga sem eru eftir leikinn í 3. sæti deildarinnar með 26 stig eftir 14 leiki. Breiðablik situr í 5. sæti deildarinnar með 23 stig eftir 15 leiki.
Í Árbænum tóku heimamenn í Fylki á móti sjóðandi heitum FH-ingum.
Björn Daníel Sverrisson skoraði fyrsta mark leiksins fyrir FH á 48. mínútu. Hann var síðan aftur á ferðinni á 59. mínútu er hann kom FH í 0-2 forystu.
Ólafur Karl Finsen bætti síðan við þriðja marki FH á 61. mínútu. Arnór Gauti Ragnarsson náði að minnka muninn fyrir Fylki á 64. mínútu en aðeins fjórum mínútum síðar skoraði Ragnar Bragi Sveinsson, leikmaður Fylkis, sjálfsmark.
Lokatölur í Árbænum 1-4 sigur FH eru eftir leikinn í 2. sæti deildarinnar með 29 stig eftir 14 leiki. Fylkir er um miðja deild í 6. sæti með 22. stig eftir 15 leiki.
Stjarnan 1-5 Valur
0-1 Patrick Pedersen (‘4)
0-2 Patrick Pedersen (’17)
0-3 Aron Bjarnason (’21)
0-4 Aron Bjarnason (’31)
0-5 Birkir Már Sævarsson (’34)
1-5 Sölvi Snær Guðbjargarson (’62)
Breiðablik 0-2 KR
0-1 Ægir Jarl Jónasson (’10)
Fylkir 1-4 FH
0-1 Björn Daníel Sverrisson (’48)
0-2 Björn Daníel Sverrisson (’59)
0-3 Ólafur Karl Finsen (’61)
1-3 Arnór Gauti Ragnarsson (’64)
1-4 Ragnar Bragi Sveinsson (’68, sjálfsmark)