RÚV greinir frá því að vélin hafi lent rúmlega hálftíma eftir miðnætti og þarf liðið því og allir sem voru með í för að fara í fjögurra til sex daga sóttkví. Ástæða ferðarinnar var leikur KR við Celtic í forkeppni Meistaradeildarinnar en KR tapaði leiknum, 6-0. KR á að spila við Val á Laugardag en ef liðið þarf að vera í sóttkví þá missir það af leiknum.
Jónas Kristjánsson, framkvæmdastjóri knattspyrnudeildar KR, segir í samtali við RÚV að hann viti ekki betur en að liðið þurfi að fara eftir nýju reglunum sem tóku gildi á miðnætti. Í reglunum segir að allir sem fara í sýnatöku við komu til landsins þurfi að fara í 4-5 daga sóttkví og síðan í aðra sýnatöku.
FH, Víkingur og Breiðablik eiga öll eftir að fara til Evrópu á næstunni til að spila í forkeppni Evrópudeildarinnar og munu þessar reglur því að öllum líkindum hafa áhrif á þau lið líka.
