Guðjón Þórðarson er nýr þjálfari Víkings Ó. í Lengjudeild karla en þetta kemur fram í kvöld.
Guðjón hefur verið án félags síðustu mánuði en hann var síðast þjálfari NSÍ í færeysku úrvalsdeildinni.
Guðjón er gríðarlega reynslumikill þjálfari en hann var á sínum tíma landsliðsþjálfari Íslands og stoppaði í þrjú ár hjá Stoke.
Jón Páll Pálmason var rekinn frá Víkingum á mánudag en sú ákvörðun kom mörgum á óvart.
Guðjón er 64 ára gamall en hann þjálfaði síðast Grindavík hér heima fyrir átta árum síðan.
Tilkynning Víkings:
Víkingur Ó. hefur ráðið Guðjón Þórðarson sem næsta þjálfara liðsins. Hann tekur við liðinu út yfirstandandi tímabil.
Guðjón þarf ekki að kynna fyrir áhugamenn um knattspyrnu enda einn reyndasti þjálfari landsins. Brynjar Kristmundsson mun stýra liðinu gegn Aftureldingu á föstudag og Guðjón tekur svo formlega við eftir leikinn.
Stjórn Víkings Ó. býður Guðjón velkominn til starfa og væntir mikils af samstarfinu.