Fjórða umferð í efstu deild kvenna hefst á morgun með einum leik. ÍBV tekur á móti Val. Tveir aðrir leikir áttu að fara fram á morgun. Þeim hefur verið frestað vegna Covid-19 smita hjá Fylki og Breiðablik. Á miðvikudaginn fer einn leikur fram. Stjarnan tekur á móti Selfoss í Garðabæ. KR og FH áttu einnig að spila á miðvikudaginn en þeim leik hefur verið frestað vegna þess að allt KR liðið er í sóttkví.
Eins og fyrr segir leggja Valskonur land undir fót á morgun og mæta ÍBV á Hásteinsvelli í Vestmannaeyjum. Valur hefur farið vel af stað og eru þær með fullt hús stiga. ÍBV er með þrjú stig eftir þrjá leiki og má því búast við erfiðum leik fyrir heimastúlkur.
Andri Ólafsson þjálfari ÍBV er spenntur að fá Val í heimsókn. „Leikurinn leggst hrikalega vel í okkur. Það er svolítið síðan við unnum leik og okkur langar að ná í stig af þeim. Við þurfum að halda einbeitingu allan leikinn og gera þetta saman. Við þurfum að eiga okkar besta leik til að ná í öll stigin sem er markmiðið.“
Elín Metta og Hlín hafa verið í miklu stuði í upphafi móts. Varnarmenn ÍBV mega búast við að fá þær á sig af fullum krafti. „Við ætlum að loka á þær og beina þeim inn á við og sjá til hvað gerist. Þær eru með frábæra sóknarmenn, bæði Elín og Hlín og auðvitað líka á hinum kantinum.
Það breytir ekki öllu hvort við pælum í einum til tveimur leikmönnum eða öllum, þær eru með gæði út um allt og eru með eitt af bestu liðunum á landinu. Við erum með ákveðnar hugmyndir um hvernig við ætlum að stoppa þær og svo verður þetta bara að koma í ljós“ segir Andri.
Andri er ekki sáttur með að vera einungis með þrjú stig eftir fyrstu þrjá leikina. „Við áttum svo sem lítið skilið á móti Þór/KA þar sem við vorum bara lélegar. Það er kannski sama uppi á teningnum með leikinn á móti Stjörnunni. Það var að minnsta kosti ekki markmiðið að vera með þrjú stig eftir þrjá leiki.“
Andri segir þær rétt vera að byrja og liðið er enn að spila sig saman. „Það tekur smá tíma að spila liðið saman. Við höfum bæði verið að glíma við meiðsli og leikmenn að koma nýir inn. Sumar komu seint og þurftu að fara í sóttkví við komuna til landsins sem er bara eðlilegt.“
ÍBV fær ekki frekari liðsstyrk áður en glugginn lokar á morgun en Andri segir þó að einhverjar breytingar verði á hópnum sem munu koma í ljós í vikunni.
Andri vonar að mótið muni spilast nokkuð eðlilega í sumar í ljósi aðstæðna. „Það vill enginn taka sénsa og við erum sjálfir með leikmenn sem myndu ekki spila ef það væri minnsta hætta á smiti.“
ÍBV – Valur
Stjarnan – Selfoss
Frestaðir leikir
Þór/KA – Fylkir
Þróttur R. – Breiðablik
KR – FH
