KR skoðar það að fara í skaðabótamál við fasteignafélagið Regins vegna þess að félagið hafi vanrækt skyldu sína við umhirðu á gervigrasinu í Egilshöll. Þetta kemur fram í ítarlegri grein Fréttablaðsins.
Gunnar Þór Gunnarsson varnarmaður liðsins sleit líklega krossband í Egilshöll í upphafi vikunnar en Emil Ásmundsson leikmaður KR sleit krossbandið á þessum sama velli í upphafi árs.
Um langt skeið hefur verið kvartað undan því hvernig grasið í Egilshöll er, það er mikið notað og þegar leikir fara fram er það sjaldan vökvað.
„Við erum að skoða það hvort það sé grundvöllur fyrir bótarétti, og þá að sækja bætur í hendur Regins. Við teljum að við, og okkar leikmenn, höfum orðið fyrir fjárhagslegu tjóni vegna vanrækslu fasteignafélagsins,“ segir Páll Kristjánsson, formaður knattspyrnudeildar KR, í samtali við Fréttablaðið.
„Að okkar mati hefur Reginn vanrækt þá skyldu sína að sjá til þess að viðhald sé með þeim hætti að gervigrasið í Egilshöll uppfylli þau skilyrði að völlurinn sé hættulaus leikmönnum. Af þeim sökum hafi mögulega myndast réttur til skaðabóta. Málið er í vinnslu innan okkar raða,“ segir Páll.
Grein Fréttablaðsins er ítarleg en þar er meðal annars rætt við leikmenn úr deildinni um ástand vallarins. „Ein úr efstu deild kvenna sagði það viðbjóð að spila þarna,“ segir í grein Fréttablaðsins sem má lesa í heild hérna.
