Kristján Óli Sigurðsson sérfræðingur Dr. Football fékk það verðuga verkefni að velja tíu bestu leikmennina í Pepsi Max-deild kvenna.

Kristján Óli greindi frá vali sínu í þætti dagsins en kröftug umræða skapaðist um val Kristjáns. „Mesta þvæla sem ég hef heyrt,“ sagði Mikael Nikulásson þegar Kristján greindi frá því að Hallbera Guðný Gísladóttir bakvörður landsliðsins og Vals væri ekki á listanum.

Kristján útskýrði val sitt. „Ég var í faglegri heimavinnu alla helgina, ætlið þið að treysta mér? Endurspeglar kannski ekki mat þjóðarinnar en þetta er faglegt mat.“

„Ertu bilaður?,“ sagði Hjörvar Hafliðason þegar Kristján greindi frá því að Dagný Brynjarsdóttir væri í fjórða sæti listans en hún hefur verið einn besti leikmaður íslenska landsliðsins síðustu ár.

Kristján Óli sagði að valið um besta leikmanninn hafi verið afar erfitt. „Ég sofnaði ekki í nótt þegar ég var að negla niður fyrsta og annað sætið,“ sagði Kristján en listi hans er hér að neðan.

Tíu bestu í Pepsi Max-deild kvenna að mati Kristjáns:

10 – Áslaug Munda Gunnlaugsdóttir (Breiðablik)

9 – Fanndís Friðriksdóttir (Valur)

8 – Hlín Eiríksdóttir (Valur)

7 – Anna Björk Kristjánsdóttir (Selfoss)

6 – Sveindís Jane Jónsdóttir (Breiðablik)

5 – Berglind Björg Þorvaldsdóttir (Breiðablik)

4 – Dagný Brynjarsdóttir (Selfoss)

3 – Alexandra Jóhannsdóttir (Breiðablik)

2 – Elín Metta Jensen (Valur)

1 – Agla María Albertsdóttir (Breiðablik)