Harpa Karen Antonsdóttir leikmaður Hauka í knattspyrnu upplifði mikinn gleðidag í vikunni þegar hún snéri aftur á knattspyrnuvöllinn. Veturinn hefur verið erfiður fyrir Hörpu sem hefur barist við krabbamein. Fótbolti.net fjallaði fyrst um málið.
Harpa er fædd árið 1999 en fyrir átta mánuðum byrjaði hún í lyfjameðferð vegna krabbameins, sex mánuðir eru síðan að hún kláraði þá meðferð.
Harpa hafði verið með hausverk í þrjú ár og fagnar nú sigri með því að snúa aftur á knattspyrnuvöllinn. „Er svo ótrúlega glöð og stolt af sjálfri mér, búin að leggja svo mikið á mig og koma mér í hlaupaform upp á síðkastið, gat ekki hlupið einn fótboltahring í byrjun janúar,“ skrifar Harpa í færslu á Instagram en hún fagnar 21 árs afmæli sínu í júlí.
„Þetta er svo stór sigur fyrir mig og búið að vera markmiðið mitt síðan ég byrjaði í meðferð,“ skrifaði Harpa sem brosti út að eyrum eftir að hafa spilað sinn fyrsta leik gegn KR.
„Góð byrjun á sumrinu og LOKSINS fótbolti. Getið séð á síðustu mynd hversu glöð ég var að fá að spila.“
Harpa ólst upp í Val en systir hennar er Hildur Antonsdóttir sem á að baki leiki fyrir A-landsliðs kvenna og spilar í dag með Breiðablik.
