Kristján Daði Finnbjörnsson og Grótta hafa náð samkomulagi um starfsflokk hans en Kristján var rekinn úr starfi í janúar. Deilur þessara aðila höfðu ratað í fjölmiðla. Félagið hafði ekki viljað greiða Kristjáni uppsagnarfrest og ræddi hann málið við DV í síðasta mánuði. Eftir fréttaflutning hefur náðst sátt í málinu.
Meira:
Pabbapólitík á Seltjarnarnesi? – „Ég get ekki tjáð mig um þennan hluta“
Kristján þjálfaði 6. , 5. og 4. flokk karla hjá Gróttu, hann var ráðinn til starfa aftur síðasta haust. Kristján hafði ýmis gögn er varðar málið á sínum höndum, þar kemur meðal annars fram í einu bréfi frá Gróttu að félagið vildi losa hann úr starfi hjá 4. flokki en halda honum í starfi í öðrum flokkum. Í 4. flokki Gróttu eru synir tveggja stjórnarmanna hjá félaginu, faðir annars þeirra er Birgir Tjörvi Pétursson, formaður knattspyrnudeildar. Birgir vildi ekki ræða við blaðamann um málið á sínum tíma . ,,Þetta á sér tveggja vikna aðdraganda, þessir tveir drengir höfðu alltaf verið í hóp hjá A-liði. Eftir áramót voru synir þessara tveggja aðila að haga sér verr en áður, annar þeirra var mjög dónalegur og með stæla við aðra stráka í flokknum. Hann var að lítillækka samherja sína, ég sendi á mömmu hans og vildi leysa þetta. Ég fékk engin svör, þetta er á föstudegi og eftir helgi var mér vikið úr starfi. Mér var vikið úr starfi á mánudegi, degi áður höfðu synir þessara aðila ekki verið í A-liði, í fyrsta sinn,“ sagði Kristján við DV í apríl.
Þegar DV hafði samband við Kristján í gær sagðist hann ekki geta tjáð sig um málið en benti á að Vilhjálm H. Vilhjálmsson, lögfræðing sinn. Í skriflegu svari til blaðamann segir Vilhjálmur. „Knattspyrnudeild Gróttu og Kristján Daði Finnbjörnsson hafa náð samkomulagi um lausn þess ágreinings sem hlaust af starfslokum Kristjáns Daða hjá Gróttu. Aðilar hafa ákveðið að ræða málið ekki frekar í fjölmiðlum og óska hvorum öðrum velfarnaðar í störfum sínum í framtíðinni,“ sagði Vilhjálmur í svari til blaðamanns.
Kristján var á sínum tíma svekktur með að fá ekki útskýringar á uppsögn sinni og að fá ekki greiddan uppsagnarfrest. . „Ég virði alveg að menn nýti sín völd, ég hefði þá viljað fá útskýringar og að þeir myndu borga uppsagnarfrest. Ekki að tala í hringi og segja eitthvað annað en það sem gerðist í raun og veru. Það kom ekki nein útskýring,“ sagði Kristján.
Samkvæmt heimildum DV sættist Grótta á það að greiða uppsagnarfrest eftir fréttaflutning um málið.
